चौंथो संस्करणको स्थानीय तह शहिद स्मृति अन्तराष्ट्रिय मकवानपुर गोल्डकप फुटबल प्रतियोगिताको उपाधि साविक विजेता विभागीय टोली त्रिभुवन आर्मी क्लवले हात पारेको छ । सोमबार हेटौंडा–५ स्थित पिप्ले क्याम्पा रंगशालामा सम्पन्न प्रतियोगितामा घरेलु टोली विजय युथ क्लवलाई २–१ गोलले पराजित गर्दै उपाधि आफ्नो कब्जामा पार्न सफल भएको हो ।
आर्मीले यसअघिको संस्करण पनि जितेको थियो । आर्मीलाई उपाधि दिलाउनको लागि कप्तान भरत खवास र कमल बहादुर थापाले एक–एक गोल गरेका थिए । विजय युथका डोना थापाले एक गोल फर्काएका थिए । खेलको म्यान अफ द म्याच आर्मीका कमल बहादुर थापा घोषित भए । उनले नगद १० हजारसहित शिल्ड प्राप्त गरे । उपाधि जितेसँगै आर्मीले १५ लाख रुपैयाँ र उपविजेता विजय यूथले १० लाख रुपैयाँ नगदसहित शिल्ड, मेडल तथा प्रमाणपत्र प्राप्त गरेको छ ।
प्रतियोगिताको सर्वोत्कृष्ट खेलाडी विजय युथका गोलरक्षक अशोक बराल घोषित भए । उनले रोयल इन्फिल्ड बुलेट बाईक प्राप्त गरे । बुलेट बाइक हेटौंडा स्कुल अफ म्यानेज म्यान्टले उपलब्ध गराएको थियो । यस्तै प्रतियोगिताको विधागततर्फ आर्मीले क्लिनसिप गर्यो । उत्कृष्ट फरवार्ड दिनेश हेम्जन, उत्कृष्ट डिफेन्डरमा बिमल पाण्डे, उत्कृष्ट गोलरक्षकमा विकेश कुथु, उत्कृष्ट मिडफिल्डर बिवेक बस्नेत र आर्मीकै नबिन न्यौपाने उत्कृष्ट कोच घोषित भए । विधागत उत्कृष्ट हुनेहरुलाई २५–२५ हजार सहित मेडल पाए। गोल्डकपको विजेता र उपविजेतालाई प्रमुख अतिथि बागमती प्रदेश प्रमुख प्रतिपक्ष दलका नेता इन्द्र बहादुर बाँनिया, हेटौंडा उपमहानगरपालिकाका उपमेयर राजेश बानियाँ, वडाअध्यक्ष सुशिल घिमिरे लगायतले पुरस्कार बितरण गरेका थिए ।
तस्विर : खेलकुद हेटौंडा