पाँचौ सहिद स्मृति स्थानीय तह अन्तर्राष्ट्रिय मकवानपुर गोल्डकपको उपाधि मनाङ मस्र्याङदी क्लवले जितेको छ । शनिबार हेटौंडा–५ स्थित क्याम्पा रंगशालामा भएको फाईनल खेलमा हिमालयन शेर्पा क्लवलाई १–० गोलले पराजित गर्दै मनाङले उपाधि उचालेको हो ।
प्रतिस्पर्धात्मक खेलमा दोस्रो हाफको ७७ औं मिनेटमा मनाङका रोशन राना मगरले गरेको गोल नै जितको लागि निर्णायक गोल बन्यो । हिमालयन शेर्पाले केही अवसर पाएपनि गोल गर्न भने चुकेको थियो । उपाधि उचालेसँगै मनाङले नगद १५ लाख रुपैयाँ प्राप्त गरेका छन् भने उपविजेता बन्दै हिमालयन शृर्पाले नगद १० लाख प्राप्त गरेका छन् ।
खेलको म्यान अफ द म्याच गोलकर्ता रोशन राना मगर नै घोषित भए । उनले नगद १० हजार प्राप्त गरे । प्रतियोगिताभरि उत्कृष्ट खेलाडी मनाङका गोल रक्षक दीप कार्की घोषित भए । उनले बुलेट बाईक पाएका छन् । बाईक हेटौंडा स्कुल अफ म्यानेजमेन्टले प्रायोजन गरेको थियो ।
