निरन्तर वर्षाको कारण आएको बाढी तथा पहिरोले हेटौंडा –काठमाण्डौ जोड्ने सबै सडक मार्गहरु अवरुद्ध भएको छ । हेटौंडाबाट काठमाण्डौ जोड्ने छोटो सडकमार्ग तीन दिनदेखि बन्द रहेको छ । हेटौंडा–भैसे सडक खण्डमा भिमफेदी १ बाघझोरामा, भैसे–भीमफेदी–फाखेल र सिस्नेरी सडक खण्डमा पान्द्राङ, गढी, देराली , ईन्द्रसरोबर महा लक्ष्मीखोला , कुलेखानीमा पहिरो जाँदा सडक अवरुद्ध भएको जिल्ला प्रहरी कार्यलय मकवानपुरले जानकारी दिएको छ ।

यसैगरि कान्तिलोक पथ अन्तर्गत भिमफेदी ८ कोगटेमा पहिरोले सडकको पिचनै बगाएको प्रहरीले जनाएको छ । कान्तिलोक पथकै ललितपुरको भट्टेडाडामा पनि पहिरो गएर सडक अवरुद्ध छ । हेटौंडा काठमाण्डौ जोड्ने पुरानो सडकमार्ग त्रिभुवन राजपथ सडक खण्डको अघोर,थाहा नगरपालिकाको खानीगाउँ, गैरीगाउँमा पहिरोले सडक अवरुद्ध बनाएको छ । मौसममा सुधार आएपछि पहिरो पन्छाउने कार्य सुरु गरिने र अवरुद्ध यातायात सेवा सूचारु गरिने जिल्ला प्रहरी कार्यालयले जानकारी दिए ।