२०२०को क्रिसमसमा अक्षय र आमिर बक्सअफिसमा भिड्दै

आगामी अगस्ट १५ बाट विश्वभर एकसाथ प्रदर्शनमा आउन लागेको अक्षय कुमार अभिनीत चलचित्र ‘मिसन मङ्गल’को चर्चा यति बेला बलिउड लगायतका मिडियामा छाइरहेको छ । केही दिन अघि चलचित्रको ट्रेलर सार्वजनिक गरिएको थियो । जसलाई दर्शकले निकै रुचाइरहेका छन् । यसै बिच अक्षय कुमारले आफ्नो नयाँ चलचित्रको फर्स्ट लुक सार्वजनिक गरेका छन् । चलचित्र ‘बच्चन पाण्डे’को निर्माण घोषणासँगै अक्षयले आफ्नो फर्स्ट लुक सार्वजनिक गरेका हुन् । चलचित्र २०२० को क्रिसमसमा रिलिज हुने पनि पक्का भएको छ । यसै मितिमा अर्का बलिउड स्टार आमिर खान र करिना कपुर स्टारर चलचित्र ’लालसिंह चड्ढा’ रिलिज हुने घोषणा भइसकेको छ । अब बलिउडका दुई आक्रामक अभिनेताका चलचित्र बक्स अफिसमा एकसाथ भिड्ने भएका छन् । दुवै चलचित्र निकै प्रतीक्षित हुनेमा त शङ्का छैन नै साथमा यो भिडन्त निकै रोचक हुने देखिन्छ ।