भदौ १५, २०७६ काठमाडौं – जनकपुरधाम उपमहानगरपालिकाले हिन्दु धर्मालम्वीहरूको पर्व हरितालिका तीज तथा गणेश चतुर्थी (चौठ चन्द)का अवसरमा सार्वजनिक बिदा दिने निर्णय गरेको छ। उपमहानगरका निमित प्रमुख प्रशासकीय अधिकृत गणेशप्रसाद यादवले जारी गरेको विज्ञप्तिमा तीज र गणेश चतुर्थीको शुभकामना व्यक्त गर्दै सोमबार उपमहानगरपालिकाले सार्वजनिक बिदा दिने निर्णय गरेको उल्लेख गरिएको छ।
सोमबार देशभरका हिन्दु महिलाहरूले तीज पर्व मनाउँदै छन्। हिन्दु महिलाहरूले मनाउने तीज भाद्र शुक्ल द्वितीयादेखि पञ्चमीसम्म चार दिन मनाइन्छ। तीजमा भगवान् शिवको आराधना गरिनुका साथै नाचगान मनोरञ्जनसमेत गर्ने गरिन्छ। तीजमा महिलाहरूले आफ्ना परिवारका सदस्यको दीर्घायुका लागि व्रत बस्ने पनि गर्छन् त्यसैगरी, चौठचन्द पर्वमा सन्तानको दीर्घायू, दाम्पत्य सुख र शान्ति एवं समृद्धका लागि महिला व्रत बस्ने गर्छन्।
व्रत बसेका महिलाले साँझ विधिपूर्वक चन्द्रमाको दर्शन गरेपश्चात भोजन गर्ने चलन रहेको छ।
