काठमाडौं – आज साउन १५ गते, घरघरमा खीर खाएर यो पर्व मनाइँदै छ । असार १५ मा दही चिउरा खाएको ठीक एक महिनापछि साउन १५ मा खीर खाने चलन रहँदै आएको छ । साउन १५ पछि लोकमा जाडो शुरु हुने मानेर ताप प्राप्त हुने पोषिलो परिकार खीर खाने चलन चलेको जनकथन छ ।

दूधमा चामल मिसाई पकाइएको खीरलाई स्वादिष्ट बनाउन मरमसलाका साथै सखर पनि हालिन्छ । यसरी बनाईएको खीर शक्तिवर्धक हुनुका साथै रोगनिवारक पनि हुन्छ । मानव शरीरलाई आवश्यक पोषकतत्व पूर्ति गर्न र बेलाअनुसार आहारको स्वाद लिन नेपाली समाजमा थरीथरीका परिकार खाने चलन छ । यस्ता परिकारले मानव शरीर स्वस्थ राख्न सहयोग गर्ने बताइन्छ ।