मृत अवस्थामा भेटिएकी तेस्रोलिंगी अजिता भुजेलको बलात्कारपछि हत्या

गत शनिबार हेटौंडा उपमहानगरपालिका–५ क्याप्पाडाँडामा मृत भेटिएकी अजिता भुजेलको बलात्कारपछि हत्या भएको तेस्रोलिंगी अधिकारकर्मी सूरजकिरण थापाले दावी गरेका छन् । लैंगिक अल्पसंख्यक अधिकारका लागि काम गर्दै आएकी भुजेलको शव विभत्स अवस्थामा शनिबार हेटौँडा–५ क्याम्पाडाँडामा फेला परेको थियो ।

भुजेलको घटना रहस्यमय रहेकाले गहिरो अनुसन्धानका लागि शवको विस्तृत जाँच गर्न त्रिवि शिक्षण अस्पताल लगिइएको थियो । अधिकारकर्मी थापाका अनुसार भुजेल नग्न अवस्थामा भेटिएकोले बलात्कार भएको हुनसक्ने अस्पतालका चिकित्सकले बताएका छन् । हेटौंडा–११, नवलपुरकी २९ वर्षकी तेस्रोलिंली अजिताको शवको शिक्षण अस्पताल महाराजगन्जमा पोस्टमार्टमपछि नवलपुरमा सोमबार दाहसंस्कार गरिएको आजको नेपाल समाचारपत्रमा समाचार छ । पोस्टमार्टममा अजिताको घाँटीमा निलडाम, टाउकोमा चोट देखिएको चिकित्सकले बताएको उनको परिवारले जानकारी दिएका छन् ।